Dowladda Kenya ayaa caddaysay inaysan faragelin ah ku heynin qorshaha maamul u samaynta gobollada Jubbooyinka iyo Gedo ee haatan socda.

Ku xigeenka wasiirka arrimaha dibedda Kenya Richard Onyonka ayaa sheegay in dowladdiisa aysan faragelin siyaasadeed ku haynin howlaha maamul loogu sameynayo Jubbooyinka, isagoo sheegay in Soomaaliya ay tahay dal madax-bannaan oo xaq u leh inay maamul u samayso gobollada dalka.

Onyonka ayaa hadalkan ka sheegay maanta kulan uu soo qabanqaabiyay xafiiska dhinaca isgaarsiinta ka taageera Midowga Afrika iyo Qaramada Midoobay ee AU/UN IST.

Kulanka ayaa looga hadlayay waxqabadka iyo doorka ciidamada AMISOM ay ku leeyihiin dib u dhiska nabadda Soomaaliya.

Wasiirka ayaa u jeediyay beesha caalamka inuu sii wado gargaarka bini’aadannimo ee la siiyo Soomaaliya, isla markaana uu noqdo mid joogta ah.

Hadalka wasiirka ayaa imaanaya iyadoo uu jiro shaki ah in qaar ka tirsan dalalka ku bahoobay urur goboleedka IGAD ay ku lug leeyihiin qorshe maamul loogu yagleelayo gobollada Jubbooyinka iyo Gedo, kaasoo ka socda magaalada Nairobi.