Maamulka gobolka Mudug ee Puntland ayaa maanta meel fagaare ah ku gubay lacag been abuur aheyd oo isugu jirtay doollar iyo shilin Soomaali oo ciidamada booliska ay ka soo qabteen suuqyada magaalada Gaalkacyo ee xarunta gobolka Mudug.

Agaasimaha maaliyadda gobolka Siciid Cali Yuusuf (Gaaddo-yare) ayaa warbaahinta u sheegay in lacagta la gubay oo ku jirtay jawaanno ay gaareysay 50 milyan oo shilin Soomaali ah iyo 130,000 oo doollar oo been abuur ah.

Agaasimaha wuxuu sheegay inay jiraan dad doonaya inay dhacaan hantida ummadda, kuwaasoo uu ku eedeeyay inay lacag been abuur ah ku sameeyaan deegaannada maamulka Puntland iyo guud ahaan gobollada dalka Soomaaliya.

Guddoomiyaha gobolka Mudug ee maamulka Puntland, Maxamuud Yuusuf Tigey oo isna ka hadlay goobta lacagta lagu gubay ayaa uga digay ganacsatada gobolka inay isticmaalaan lacagta been abuurka ah, oo uu sheegay inay keeni karto sicir barar ku yimaada maciishadda haddii ay suuqyada gasho.

Maxamuud Yuusuf ayaa ka codsaday shacabka iyo ganacsatada gobolka inay ka digtoonaadaan lacagtaas been abuurka ah.

Maamulka gobolka Mudug ee Puntland ayaa horraantii sanadkan uga digay shacabka iyo ganacsatada lacag shilin Soomaali ah oo been abuur ah, taas oo la sheegay in ay soo gashay magaalada Gaalkacyo ee xarunta gobolka Mudug.