Heyadda u dooda xuquuqda aadanaha ee Human Rigths Watch ayaa warbixin ay soo saartay waxay ku eedeeysay ciidamada Booliska Kenya iney falal ka dhan bani aadamnimada kula dhaqaaqan Soomaalida ku dhaqan dalka Kenya.

Human Rigths Watch ayaa sheegtay in marka ay ciidamada Kenya la kulmaan weerar kaga yimaada kooxo hubeysan oo argagixiso ah, ay jirdil iyo xarig kula dhaqaaqaan dadka goobta ka dhaw ee Soomaalida ah, iyagoo aan baaritaan ku sameynin cida dembiga leh iyo cida kale.

“Baaritaano aanu sameynay waxaan ku ogaanay in dad Soomaaliyeed oo ku dhaqan magaalada Gaarisa loo geystay xadgudubyo isugu jira jirdil iyo xarig sharci daro ah, ka dib weerar lagu soo qaaday ciidamada Booliska magalaada Gaarisa, arintaasna waa mid laga naxo” ayaa lagu sheegay qoraal ka soo baxay Human Rigths Watch.

Sarkaal ka tirsan Human Rigths Watch oo la yiraahdo Otsieno Namwaya ayaa sheegay in xad gudubyada ay ku kacaan booliska Kenya uu joogto noqday, uuna gaaray heer ay dadka iska toogtaan iyadoo aan la qaban,m la baarinm, maxkamadna la soo taagin.

Afhayeenka ciidamada Booliska Kenya Eric Kerith ayaa beeniyay eedeeymahaas loo jeediyey, isagoo xusay in ciidamada Booliska Kenya aysan ku kicin waxyaabaha ay sheegeyso Human Rigths Watch, isagoo eedeeymaha noocaas ah ku tilmaamay kuwo ujeedooyin kale laga leeyahay oo aan sax aheyn.