ASOJ.ORG -Ururka isu taga Suxufiyiinta Soomaaliyeed ee ASOJ ayaa Abaalmarinta Wariyaha sanadka siiyay Mohamed Ahmed Ilkacase oo socdaalkiisii Muqdisho ka sameeyay faallo taariikhiya.

Wariye Ilkacase oo ka tirsan Telefishinka Qaranka Somalia SNTV wuxuu faaladiisa ugu magac daray Xamar iyo Maanta hasse yeeshee waxaa  ka muuqatay Aftahanimo iyo heybad alle siiyay .

Kumanaan kun ayaa u riyaaqay Warbixintiisa oo waliba waxaa lagu tilmaami karay mid aan daawashadeeda mar qura oo la fiirsada looga bogan karin,waana sababta dad badan ku qasabtay inay bogaga Facebook ku leeyihiin hadba todobaad kasta ku sharaxaan.

Gebagebada Warbixintiisa xigmad uu adeegsaday ayaa Xeeldheerayaasha Saxaafadda ku noqday fajac iyo filanwaa,

Ilkacase oo safarkiisii ugu horeeyay noloshiisa ku tegay Muqdisho wuxuu yiri ” Maxaan ku tilmaamaa Xamarta Maanta? Ma waxaan iraa Waa Xeego oo xurmo iyo xanafba weey taalaa ? mise waxaan iraahdaa,waa sidii misigtii la falfaliyay oo laf iyo cadba waa leedahay? mise sida dadka guraca wax u eego ayaan iraahdaa,Xamar waa Xarunta ma degayaasha Geeska Afrika? maya ee aan iraahdo Xamar Cadeey Barasho wanaagsan !

Associated Somali Journalists ASOJ oo Ilkacase u aragto inuu yahay Wariye tusaale u noqon kara Jiilka Saxaafadda cusub waxay dhinaca kale u aqoonsatay Wariyaha sanadka ee Warbixintii ugu wanaagsanaa ka diyaariyay Caasimadda dalkiisa hooyo.

By Dahir Alasow