Wafdi ka socday qaar ka tirsan hay’adaha Qaramada Midoobay ayaa maanta booqday magaalada Kismaayo ee xarunta gobolka Jubbada Hoose.
Xubnaha wafdiga oo ka kala socday Barnaamijka Cuntada Adduunka (WFP) iyo hay’adda dhanka nabadgelyada u qaabilsan UN-ka ayaa kulamo la qaatay saraakiisha ciidamada dowlada Soomaaliya ee dhowaan la wareegay magaalada.
Kulanka waxaa looga hadlay arrimaha ammaanka iyo sidii gar-gaar loo gaarsiin lahaa goobaha laga saaray maleeshiyada al-Shabaab.
Nin magaciisa lagu soo gaabiyay Dr. Yusuf oo sheegtay inuu yahay madaxa samafalka ee gobollada Jubbooyinka ayaa sheegay inuu wafdiga kala hadlay sidii gar-gaar loo gaarsiin deegaannada laga xoreeyay al-Shabaab iyo sidii loo adkayn lahaa nabadgelyada goobaha gacanta dowlada ku jira.
Yusuf ayaa sheegay inay isku afgarteen saraakiisha Qaramada Midoobay dhammaan qodobbadii ay isla soo qaadeen.
