Saraakiisha ciidamada AMISOM ee gobolka Hiiraan ayaa kulan looga hadlayay nabadgeliyada duleedka Beledweyne kula qaatay odayaasha dhaqanka magaalada.

Kulanka oo ka dhaxay xarunta AMISOM ee duleedka Beledweyne ayaa la iskula soo qaaday ammaanka Beledweyne loo adkayn lahaa, isla markaana wax looga qaban lahaa ciidamada dowladda ee iyagoon labisnayn ku dhex socda gudaha magaalada.

Sidoo kale, kulanka waxaa looga hadlay sidii loo gargaari lahaa dadkii ay barakicisay fatahaaddii wabiga Shabeelle.

Nabaddoon Maxamed Cabdi Raaxeey oo odayaashii kulanka ka qaybgalay ka mid ahaa ayaa sheegay inay soo dhoweynayaan la shaqeynta ciidamada AMISOM, isla markaana ay gacan ka gaysanayaan nabadgaliyada gobolka.

Taliyaha ciidamada AMISOM ee Baladweyne, Kornayl Cismaan Dubbad ayaa sheegay inay ka go’an tahay ka shaqeynta ammaanka deegaannadii Shabaab laga saaray ee gobolka Hiiraan, isagoo sidoo kale sheegay inay ka shaqeyn doonaan sidii dadka fataahadda waxyeelleysay ay u gargaari lahaayeen.

Kulanka waxaa layku af-gartay in ammaanka si wada-jir ah la isaga kaashado, isla markaana tababarro la siiyo ciidamada dowladda ee Beledweyne jooga.