Madaxweynaha Soomaaliya Xasan Sheekh Maxamuud ayaa maanta waraaqaha aqoonsiga danjirennimo ka guddoomay danjiraha cusub ee Midowga Yurub uu u soo magacaabay Soomaaliya danjire Cervone D’urso.
Madaxweynaha iyo danjiraha ayaa kulan ay ku yeesheen madaxtooyada Soomaaliya waxay uga wada-hadleen xiriirka Soomaaliya iyo Midowga Yurub iyo sidii uu ururku u taageeri lahaa dowladda Soomaaliya.
Sii-hayaha xilka wasiirka arrimaha dibadda Soomaaliya Cabdullaahi Xaaji Xuseen ayaa warbaahinta u sheegay inay dowladda Soomaaliya soo dhoweynayso danjiraha cusub ee Midowga Yurub.
Danjire Cervone D’urso ayaa dhankiisa warbaahinta u sheegay inuu ku faraxsan yahay in loo soo magacaabo danjiraha Midowga Yurub ee Soomaaliya iyo inuu madaxweyne Xasan Sheekh Maxamuud ka guddoomay waraaqihii aqoonsiga.
