Daadad ka dhashay roob xooggan oo xalay ka da’ay degmada Jarriiban ee gobolka Mudug ayaa burburiyay ku dhowaan 10 guri oo ay dad deggenaayeen.

Maxamed Xuseen Axmed oo ka mid ah dadka ku nool degmada Jarriiban ayaa Bar-kulan u sheegay in qoysas badan ay barakiciyeen daadadka.

Maxamed ayaa xusay in uusan jirin khasaare nafeed oo ka dhashay daadadka, wuxuun tilmaamay in dadka magaalada ka barakacay ay degeen buur ku taalla duleedka Jarriiban.

Dadka deegaanka ayaa maanta billaabay in ay gurmad u fidiyaan dadka ay guryahooda ku burbureen daadadka.

Degmada Jarriiban ayaa 300 km dhinaca bari kaga beegan magaalada Gaalkacyo ee xarunta gobolka Mudug.