Maamulka Puntland waxa uu maanta soo dhoweeyay magacaabidda Mudane Cabdi Faarax Shirdoon (Saacid) oo shalay madaxweyne Xasan Sheekh Maxamuud uu u magacaabay raysul wasaaraha xukuumadda federaalka ee dalka Soomaaliya.

War-saxaafadeed ka soo baxay maamulka Puntland ayaa lagu sheegay in Puntland ay ku qiimeyneyso, isla markaana kula shaqeyn doonto xukuumadda cusub hadba sida ay u fuliso qodobbo ay ka mid yihiin ilaalinta dastuurka federaalka ee Soomaaliya, hirgelinta iyo dhammeystirka nidaamka federaalka ah iyo taageeridda dhismaha dowladaha xubnaha ka noqonaya dowladda federaalka ee Soomaaliya.

War-saxaafadeedka oo uu ku saxiixnaa wasiirka warfaafinta Maxamuud Caydiid Ilka-xanaf ayaa lagu sheegay in maamulka Puntland uu hormuud ka ahaa nidaamka federaalka ee Soomaaliya, dhammeystirka geeddi-socodkii lagaga baxay ku-meel-gaarnimada iyo dhammeystirka dastuurka federaalka.

Puntland waxay sheegtay inay diyaar u tahay xoojinta kaalinta kaga aaddan sidii lagu heli lahaa dowlad Soomaaliyeed oo federaal ah oo dhammeystiran.

Madaxweynaha ayaa wada-tashi muddo dheer qaatay kaddib go’aansaday inuu raysul wasaare u magacaabo Cabdiqaadir Faarax Shirdoon oo ah ganacsade ka soo jeeda gobolka Galgaduud ee bartamaha Soomaaliya.

Magacaabiddiisa ayaa timid 25 maalmood kaddib markii Xasan Sheekh Maxamuud loo dhaariyay xilka madaxweynenimo ee Soomaaliya kaddib markii uu doorasho kaga guuleystay madaxweynihii hore ee Soomaaliya Shariif Sheekh Axmed.