Sagaal qof oo rayid ah ayaa galabta ku dhaawacantay qarax bam oo ka dhacay magaalada Beledweyne ee xarunta gobolka Hiiraan.

Qaraxa ayaa ka dhashay bam gacmeed lagu tuuray saddex askari oo Itoobiyaan ah oo mareysay agagaarka buundada Liiq-liiqato ee dhex marta xaafadda Howl-wadaag, balse waxba ma aysan ku noqon qaraxaasi.

Qof ka mid ah dadkii ku dhaawacmay qaraxa oo la dhigay isbitaalka weyn ee magaalada ayaa Bar-kulan u sheegay in dhaawacyada ay isugu jiraan carruur iyo dad da’ ah oo ka ag dhowaa halka ay marayeen askarta Itoobiyaanka ee qaraxa lala beegsaday.

Sii hayaha xilka guddoomiyaha gobolka Hiiraan, ahna guddoomiye ku xigeenka arrimaha nabad-gelyada, Axmed Cabdalla Cismaan (Axmed Inji) ayaa dhaawacyada ku booqday isbitaalka.

Axmed Inji wuxuu dhaawacyada u rajeeyay caafimaad deg-deg ah, isagoo xusay inay ku raad-joogaan ciddii ka dambeysay dhibaateynta dadka rayidka ah.

Ma ahan markii ugu horreysay oo qarax lala beegsaday ciidamada dowladda Soomaaliya iyo kuwa Itooobiya ee jooga gobolka Hiiraan ay wax ku noqdaan dad rayid ah oo aan waxbo galabsan.