Galmudugnews.com – Shariifyadda DKMG iyo Gudoomiyaha gobolka Banadir Mohamud Tarsan ayaa la xaqiijiyay inay lacago badan ku baxsheen sidii liiska baarlamaanka cusub looga saari lahaa Xildhibaan Mohamud Abdullahi Weheliye (Waqaa) oo ay si weyn u baadigoobayaan dagaalyahanada Al-Shabaab.

Labada Shariif ayaa la soo wariyay inay Xildhibaan Waqaa u arkaan nin halis gelinaya damacooda siyaasadeed hadii uu Mudanayaasha baarlamaanka cusub ka mid noqdo.

Shariifyada iyo Tarsan waxay xusul duub ugu jiraan in kursiga Waqaa lagu bedelo nin ka soo jeeda qabiilkiisa laakiin qadiyad ahaan taabacsan damacooda siyaasadeed.

Xildhibaan Waqaa oo ka mida dhalinyarada Muqdisho saameeynta weyn ku leh wuxuu u dhashay Hawiye,Habargidir Ceyr.

Hogaamiyaha labaad ee Al-Shabaab Mukhtaar Roobow Cali (Abuu Mansuur) ayaa hore u shaaciyay inay lacag dhan boqol kun oo dollar siin doonaan cidii disha Xildhibaan Waqaa .

Al-Shabaab waxay Waqaa ku eedeeynayaan inuu taageero Cadawga Islaamka waxay ku sheegaan.

Mohamud Abdullahi Weheliye Waqaa wuxuu ka mid yahay siyaasiyiinta ololaha badan ee kacdoonada bulsho si sahlan u abaabula.

Masuuliyiin ka tirsan DKMG Somalia oo Waagacusub la soo xiriiray ayaa Madaxweyne Shariif ku eedeeyay inuu maleegayo sidii Xildhibaan Waqaa looga saari lahaa liiska Baarlamaanka cusub taas oo horseedi karta inuu gacanta Al-Shabaab galo.

Labada Shariif waxay ku caan baxeen inay jalaafeeyaan cidkastoo ay uga cabsi qabaan damacooda siyaasadeed waloow indhaha beesha Caalamkana ku jeedaan.

Si kastaba ha ahaatee,Xildhibaan Waqaa maaha siyaasi la dhayalsan karo waxayna dad badan isweydiinayaan qaabka uu xaalada u wajahi doono